شعراء

معرفش ليه الغيره موجودة

بقلم مصطفى سبتة
معرفش ليه يااللحمة الغيرة موجودة
صحصح اناالفول اللي طول عمرى موجود
أماانتي ياللحمة عامله فيها حكايات
وفكرة انك انتي وبس للزاوات معقودة
اللحمة قالت للفول إتلم يا مدمس
شايفاك كده على طول فرحان ومتحمس
على إيه عايش لي الدور يا ابو طينة ومسوس
الفول قال لها بسوس وليا الفخر
أكل الغلابة انا شاهد عليا الدهر
مشهور ويكفيني وسط البشر سمعة
بطحينة تلاقيني أو حتى بالدمعة
يعرفني جيل ورا جيل م الروضة للجامعة
أما انتي يا تعبانه للشهرة محدودة
على خشبة الجزار أهي سلعة معروضة
غالية صحيح التمن هايجور عليكي الزمن
يالحمه وعمرك ما هاتبقي موجودة .
اللحمة قالت ههءء ده قصر ديل يا ازعر
إشهد وقول الحق على إيه هاتتكبر
دا انا يابني من صغري وانا أكلة البشوات
ولا يعمل البوفتيك غير لحمي أنا بالذات
والفتة من غيري تشبع صوات وعياط
ولا حد مني يمل ولا حد غيري يحل
قام حط رجل ف رجل وبعلو صوت أم قال
شوفي يا حتة عجل سيبيكي م الفشخرة
وكفاية هري كتير يا واخدة ع المنظرة
والكدب والتبرير دا انتي يا موكوسة
خلطوكي لحم حمير ناسيه جنون البقر
من كام سنة فاتوا ؟ واللي اتأذوا م البشر
ضحكت له ضحكة خوف وقالت له ما تفكك
إعمل يا فول معروف دا انا برضوا زي اختك
وكلامي كله هزار صدقني وبانغشك
دخل الشيطان وسطنا والمشكلة كبرت
انت الكبير إنما انا عيلة وغلطت .

Share Button
اقرأ ايضاً  .....شعراء

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *