الرئيسية سلايد مقالات

التلميذ والمدرس إبن المره .. شبكة صوت مصر الإخبارية

بقلم / محمود علام
من ذكريات تلميذ

فاكر المدرس ابن المره
لما مسكنى من لياقة المريله وزنقنى ف الحيطه وقال لى: ماينفعشي أكون انا اللى بدرسلك فى المدرسه وتروح تاخد درس عند حد تانى عاوز تاخد درس ؟
تاخد عندى انا ..المدرس التانى مش أحسن منى  غير كده هيبقى فى معامله تانيه
‏ لا فى أعمال سنه
‏ ولا نجاح فى نص السنه
‏ولا حتى فى آخر السنه


‏مايعرفشي ان انا مابخدشي مصروف زى زملائى وهما رايحين المدرسه
‏مايعرفشى ان انا لابس المريله والجزمه المقطوعه بتاعة اخويا اللى أكبر منى
‏مايعرفشي ان انا مدفعتش المصاريف لغاية دلوقتى وكل يومين الإدارى بن ……. يخرجنى قدام زمايلى من الفصل وينزلنى للناظر والناظر يطردنى ويكرشنى بره المدرسه

‏كرهت المدرسين والإداريين وناظر المدرسه وبتوع الكانتين اللى كانو بيضربونا علشان مانشتريش من بره…هههههه

‏ مايعرفوش ان انا اصلا مابخدشي مصروف

‏تصدق ياحوده … كنت بابقى مقتول من الجوع فى الفسحه وامشي أشحت من زملائى الأكل فى الفسحه….واتحايل عليهم علشان يدولى لقمه .. وطبعا زملائى ولاد ال ……. يقطعوا الساندوتش من تحت علشان مابيبقاش فيه طعميه بدل مايرميه …وطبعا كنت باكل زى الكلب .
‏ما انا جعان هاعمل ايه ؟

‏أول يوم دراسه كانو زمايلى بيبقوا لابسين لبس جديد فى جديد
‏وانا لا بس المريله الباهته بتاعة أخويا اللى أكبر منى بتاع السنه اللى فاتت
‏واخويا كده بردو كان لابس مريلة أخويا الكبير

‏وبعد كده كل ما اروح المدرسه قلبى يبقى مقبوض وخايف ومرعوب
‏أصل هاخش على المدرس اللى بيهزئنى وزملائى اللى بيضحكو عليا .

‏وامى تصحينى الصبح من على فرن القاعه وتزغدنى بإيد المقشه البلح وهى والقفه ف البحرايه…و تضغط عليا وتقول لى: قوم روح المدرسه علشان تتعلم وتطلع دكتور!!!!!

‏ أقولها دكتور ايه ؟ ايه ياما ؟ دا مفيش غير دكتور واحد ف البلد

‏* ينهار ازرق ؟ انت لسا فاكر الحاجات دى يااله ؟

‏عليا الطلاق بالتلاته كل ما اشوف عيل رايح المدرسه أفتكر الحاجات دى …
‏الحاجات دى منحوته فى نفوخى بالأجنه والشاكوش يابوحنف

‏طب مش فاكر المدرس اللى رجعنى وخرجنى من أرض الطابور و قال لى انت داخل حمام ؟
‏ايه الشبسب ابوصباع اللى انت لابسه ده ؟
‏ والطابور كله ضحك عليا .

‏ومايعرفشي ان معندناش حمام أصلا
‏وهو لو عندى جزمه كنت سيبتها ولبست الزنوبه دى فى عز البرد ؟
‏وبعدين انا …… ابويا ميت من زمان
‏وكنت بشتغل يومين فى الأسبوع فى المكامير علشان أحاول اشيل نفسي ف العيشه

* ‏طب بطل بقى ماتنكدشي عليا

‏يعنى الكلام بينكد عليك
‏طب اللى عاش الحياه دى ….كان يعمل ايه ؟

* ‏اممممم . وانت شغال ايه دلوقتى ؟ طلعت دكتور زى ما امك قالت لك ؟

‏دكتور ايه يا اعمى يابن …….؟ انت العما جايلك؟ شايفنى معلق السماعه ف ودانى
* ههههههه

‏رد سجون !!!! وبتمنى الموت لكل اللى ضايقنى ف حياتى .

بقولك ياحوده ‏؟ الا صحيح المدرس ده موجود دلوقتى ؟

‏* اه والله العظيم …. لسا شايفه من حوالى اسبوع نفس الدقن الطويله ونفس البربور تحت مناخيره بجلابيته المصرى أم طوق مفتوح

‏*خد خد تعالى بتجرى ليه؟
‏المخبر ده بيجرى ورايا ………اختفى

‏المخبر : انت تعرف الرجل اللى كان قاعد معاك ده؟

‏* عليا الطلاق ما اعرفه انا من الزقازيق وهو بيقول من بلد كده اسمها ء ء ء ء ء ء العمار بتاع البرقوق او المشمش عارفها؟

‏يفر المخبر خلف المدعو ….احمد …

Share Button
اقرأ ايضاً  شعلة هرم الشرق الاوسط

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.